萬寶龍國際執行總經理韓悟夫先生 、各位來賓：
晚安，我好榮幸今次獲得由「萬寶龍」公司頒發「 2007 萬寶龍國際藝術贊助大獎」，成為香港區得獎者。首先要多謝大會對我四十年嚟嘅藝術工作成績給予肯定，另外我要多謝咁多年嚟，同我合作過嘅藝術團體，係你地比機會我可以涉足唔同嘅藝術範疇，提升藝術文化修為，呢份光榮同喜悅希望晌今晚可以同大家分享。
特首帶頭話「我要做好呢份工」，而我一入演藝圈，就以「做好呢份工」為目標，四十年嚟，無論係影視或者其他藝術工作，都堅持緊守崗位，做好每個 job ，相信我，以香港地道說話咁講，只要你夠「堅」，凡事撐到底，就冇乜嘢可以難到你。咁點先可以令到自己咁「堅」呢？就咁話自己「堅」係冇用嘅，要付諸行動，就係堅持努力、堅持學習、堅持信念，咁你就可以得到其他人嘅認同，亦好似我四十年都咁「堅」啦。
正如「萬寶龍」國際品牌，因為夠「堅」，先可以屹立百年，我最欣賞佢作為商業機構，肩負住一種社會使命，成立「萬寶龍文化基金」，籍住表彰不同範疇嘅藝術家對藝術工作嘅貢獻，以此弘揚藝術，促進世界和平。
藝術係人嘅知識、情感、理想、意念組合而成嘅一種表現，佢可以豐富我地嘅生活。而藝術係要薪火相傳先得以延續，而我今次得獎，當中有港幣 15 萬獎金，我將會全數捐贈比「香港中樂團」，支持佢地推動本土中樂發展。「香港中樂團」，1977 年成立，到今年已經踏入第30 年，呢支一直係香港唯一一隊擁有85 位專業演奏家嘅樂團，亦都係香港文化大使，佢地嘅樂章響遍世界各地，之前仲得到政府資助，不過晌2001 年開始，樂團變成分司化，政府資助正在逐步減少。我一直以嚟都有同樂團合作，好欣賞佢地嘅專業，欣賞佢地對於藝術嘅熱誠同追求，但係我睇到而家樂團為左要搵多d 資源，支持樂團運作，佢地擺放好多時間四出搵sponsor ，搵合作伙伴等等…其實佢地藝術家嚟，應該係無憂無慮去發展藝術，創作美妙嘅精品比大眾欣賞，而唔係要將時間同精神去搵資源。
香港作為一個國際大都會，如果單單只係追求經濟效益，我地生活就會變得非常乏味，其實市民生活都需要一個平衡，而藝術可以優化我地嘅精神生活，好可惜政府成日只係得個講字，投放晌藝術文化發展實在太少啦，西九龍嘅藝術發展藍圖，唔知幾時先可以實現，所以希望我呢個小小嘅行動，喚起政府對藝術文化發展嘅一點點關注，亦希望大家可以多多支持本地藝術發展。而作為晌香港嘅藝術工作者，你地亦都唔好灰心，記住，只要你地夠「堅」，肯撐到底，一定可以得理想實現。
最後再次多謝大會頒發呢個獎項比我，我晌度祝福「萬寶龍」業務蒸蒸日上，跨越另一個百年，多謝大家。