高馬得國畫大師、鄭培凱教授、各位藝術家，各位來賓：
雲漢秋高，桂花飄香。今日難得見到“藝廊”到處生息不少，一幅一幅嘅戲劇人物畫像，令人感到陣陣嘅墨香，畫中亦隱約見到人物嘅形態嬌美，又好似聽聞到管絃嘅奏樂聲，戲畫相融，聲色一體，煥發出古老藝術嘅新光彩。
本人難得有幸參加高馬得國畫大師嘅「戲曲人物展」，著名畫家都能夠將天地山川收喺畫裡面，筆下亦能夠畫出各種人物嘅神態。高大師數十年來，對中國古典戲曲人物畫嘅創作情有獨鍾， 40年代以漫畫見稱，多年來從事新聞出版工作， 60年代嘅佢醉心於中國戲曲，遂以中國畫形式描繪戲曲人物，捕捉戲劇當中嘅美，佢嘅漫畫、人物畫極受大眾歡迎，近幾年喺海外亦被受收藏家嘅喜愛，成為雅俗共賞嘅藝術精品。
好多國畫評論家都認為，佢能夠將漫畫藝術嘅誇張手法，結合國畫幽雅嘅技巧，稚拙諧趣之餘，又多了一份水墨氤氲嘅秀麗，帶有傳統文人畫嘅書卷氣，從而表現出一種特別嘅風格，另外，畫中更添加了中國京劇嘅表演藝術形態，只係寥寥數筆，單線勾畫，流暢簡潔，就可以令所繪畫嘅戲曲人物又生動，又有趣，可謂形神兼備，善於利用淡色嘅佢，更令人有如入夢境嘅感覺，變成一種獨特嘅風格，好似佢嘅作品《三打白骨精》、《牡丹亭》、《十五貫》等等，就能夠將當中戲曲人物既豐富而又復雜嘅內心世界表露無遺，帶到大家嘅眼前。
今日所展覽嘅名作，令我感到畫中嘅戲曲人物，猶如活現喺舞台一樣，而喺高大師嘅畫像裡面，有好多都寫有相應嘅唱詞同簡要嘅說明，圖文並茂，非常容易明白，相信大家都有所同感。
喺戲曲人物裡面，令我諗起我哋嘅粵劇編劇大師唐滌生先生，佢嘅著名劇本當中，都有劇中人嘅肖像，特別係美麗如花嘅女主角，而畫中亦都係伴有詩詞同埋劇情提點，當中嘅一切一切都教人有所懷念。
喺戲劇裡面，往往如假又如真，喺畫中嘅線條運用亦都係千變萬化，而含意所在，就係睇你從乜嘢角度嚟欣賞。相信喺今次嘅畫展當中，云云都係藝術家，能夠有幸同各位來賓聚首一堂，嚟到呢個藝術嘅寶山，相信必定滿載而歸，有所收獲。
喺度我預祝高大師畫展成功，並祝願大家藝術進步，一切如意，多謝、多謝！